مرحبا وطني العزيز :)

مرحبا وطني العزيز،

كيفك ؟ شو أخبارك ؟ إن شالله كل أمورك تمام :) 

اشتقتلك والله زمان عنك، وين مختفي هالأيام لا حس ولا خبر ؟ شو شكلك مرتاح ومبطل تعمل مشاكل مع الاسرائليين .... مش بالعادة يعني تقعد عاقل ...الله يستر شكلك ناويلنا على إشي جديد ... هالمرة شو مخبيلنا، انتفاضة ولا اجتياح جديد ولا بس جولة مفاوضات روتينية ... 

يعني لازم تراعي ظروفنا هالأيام إذا قاعد بتحضرلنا اشي، الله يخليك إحنا ناس عندها مصالح وشغل ومش فاضيين لمفاجأت جديدة، إذا بتحضرلنا اشي يا ريت ما يكون أكثر من اتفاقية سلام واعتراف باسرائيل هيك اشي ... انت أكثر واحد عارف الوضع ، رام الله والخليل ونابلس  كلها مولات ومنتزهات وملاعب كرة قدم ومدارس خاصة واجنبية والأهم مطاعم وبنوك وأبراج سكنية .. مش معقول يعني بعد كل هالتعب تجي تخربلنا كل اللي عملناه احنا وخطة سلام فياض - اللي خلتنا عايشين على القروض - والله هيك بتكون ضيعت شغل سنين على اشي فاضي .... 

أنا بقول روح ارتاح وارضى بقسمتك ونصيبك وخلينا إحنا كمان نشوف نصيبنا من هالقروض والمطاعم والابراج .. قصدي من هالدنيا.....

يلا سلامات وطني العزيز " اه صحيح شو اسمك الأصلي ؟"

التوقيع : مواطن فلسطيني عايش على القروض ومش عارف راسو من رجليه .....

  الصورة المرفقة : مخيم برج البراجنة في المساء

موطني

تحديثات حول حملة احتلوا رام الله وغزة

 أصدقائي الأعزاء ... المغردين والمدونين ... الفلسطنين وغير الفلسطينين .... نشطاء الحرية والكرامة حول العالم، 

أنتم مدعون لمشاركتنا في حملتنا الفلسطينية الجديدة " احتلوا رام الله وغزة " ...... 

لأنني سئمت الفساد الإقتصادي والسياسي الموجود في بلدي قررت إعادة احتلاله مرة أخرى حتى أذكر الشعب والمثقفين وما تسمى نفسها بقيادات سياسية وحزبية بأننا وبالرغم من كل الاتفاقيات والمهرجانات والمؤتمرات والخطابات والمناطحات الإعلامية اليومية بين فتح حماس لا نزال نعيش تحت الإحتلال، تحاصرنا المستوطنات من جهات أربع وتحرسنا الطائرات من جهة السماء .... أريد أن أدعو الجميع ليخلع القشور الحزبية العفنة الزائفة ووضعها في أقرب مكب نفايات من أجل إصلاح داخلنا الفلسطيني حتى يصلح الله حالنا للأفضل ... أريد أن أنسف كل ما له علاقة بالحزبية التي قطعت أوصال البلاد وجعلتها في حال يرثى لها .... أريد أن أرى الجميع ينعم بتنمية اقتصادية حقيقية ، وليست تنمية العيش على قروض البنوك التي اخترعها سلام فياض وخرب بيت الشعب فيها ... أريد أن أرى الجميع قادر على الوصول للجامعة والمستشفى والمدرسة من غير معقيات احتلال داخلي أو خارجي ... أريد أن أرى وجوهاً جديدة تدير شؤون البلاد ... أريد أن أرى أوسلو وما سبقها وما تلاها في غياهب الزمن ... أريد أن أنعم بوطن كامل الأوصال من غير زيادة ولا ونقصان ولا تحريف ... أريد أن أتناول قهوة الصباح في القدس وقهوة المساء في الجليل ... أريد جيلاً جديداً واعياً لا يهتم بحزب ولا بمنصب على حساب وطنه ، أريد هوية فلسطينية عربية خالصة  لا تشوبها شائبة، أريد  وطناً حراً نظيفاً خالياً من الفساد والجشع والطع وبراثن البنك الدولي ... لا أدري متى سترى حملة احتلوا رام الله وغزة النور على أرض الواقع ، لكني أكيدة بأنها ستؤتي ثمارها يوماً ما .... للإنضمام للحملة ... شاركنا: 

 1-  بنشر وسم الحملة عبر التويتر 

#OccupyRamallahGaza

2- تغيير صورة البروفايل ونشر الصورة بالعربية أو الإنجليزية للناس المهتمين بالتغيير

3-  الانضمام للمدونة أو للحملة عن طريق ترك تعليقاتكم واقتراحاتكم  واسمائكم في صندوق التعليقات على هذا المنشور ... وتذكروا دوماً بأن مشوار الألف ميل يبدأ بخطوة ... أيها الفلسطينيون احتلوا رام الله وغزة من جديد يرحمنا ويرحمكم الله ..... 

 4-  المشاركة في حملة جمع التوقيعات الاليكترونية ومشاركتها مع الاخرين عبر الرابط التالي : 

http://www.change.org/petitions/all-freedom-and-dignity-fighters-palestinians-all-around-the-world-re-occupy-ramallah-gaza-re-occupy-palestine#

احتلوا رام والله وغزة ... يرحمنا ويرحمكم الله

 احتلوا رام الله وغزة يرحمنا ويرحمكم الله .... بعد أيام سوف نقول هيا لنحتل فلسطين كاملة من النهرإلى ومن الشمال إلى الجنوب  ..... أود أن أطرح في هذه التدوينة السريعة والبسيطة توضيحات حول فكرة احتلوا رام الله وغزة...... 

من المؤكد أن المعظم منكم يسأل لماذا رام الله وغزة وليس يافا والقدس ؟  وهناك من يسأل أين الناصرة وباقي المدن المحتلة من الموضوع ؟؟ بالتأكيد القدس ويافا وحيفا والناصرة هم قلب فلسطين النابض وأي تحرك على الأرض الفلسطينية هو فاشل حتماً إذا تم استثناء القلب النابض ...لكن الفكرة تقسم إلى عدة أقسام وأهداف فأحد أهداف  الحملة هو إعادة احتلال مكان محتل أصلاً وذلك من أجل  القضاء على الفساد السياسي والاقتصادي الموجود في المدينتين الصغريتين اللواتي يتحملن فوق طاقتهن ... نريد أن نذكر الجميع بأن رام الله وغزة هما مجرد مدن فلسطينية عادية تقع تحت الاحتلال الإسرائيلي المباشر فالمدينتان محاصرتان بالمستوطنات والحواجز العسكرية من الجهات الأربعة ، فلماذا يصر كلاً من فتح وحماس على جعلهما عاصمتين لدولتين " حكومتيتن لا شرعيتن " ... نحن بمواقفتنا على هذا الشيء نحمل المدينتين فوق طاقتهما وندمرها تدميراَ واضحاً ... عندما ننجح باحتلال رام الله وغزة ونغيير  الأنظمة القائمة  فإننا ولا شك سوف نستطيع احتلال القدس ويافا وحيفا والناصرة والجولان ... فلنبدأ بغزة ورام الله حتى نصل أسوار عكا .... 

كل من تسول له نفسه بأن يقوم بالترويج لحزبه السياسي أياَ كان فهو غير مدعو ولا مرحب فيه في حملة الاحتلال تلك ... من يريد أن يشارك بالاحتلال فعليه أن يخلع قشور الحزبية الزائفة ويضعها في أقرب مكب نفايات ... لا وجود لأي حزب كان في حملتنا التي ربما ترى النور بعد سنوات .... كله يعتمد على شجاعة الشباب داخل وخارج فلسطين لدعم الحملة .... حان الوقت لكي نتوقف عن الحديث بلهجة الضحية المسكينة والبدء بالحديث بلهجو القوي صاحب الحق .... هل من مشارك ؟؟ 

احتلوا رام الله وغزة.... احتلوا وطنكم مرة أخرى  يرحمنا ويرحمكم الله .... 

" عذراً على الأخطاء اللغوية ، التدوينة كتبيت على عجل " 

احتلوا رام الله وغزة من جديد أيها الفلسطينيون يرحمنا ويرحمكم الله

بكل صراحة وحيادية وموضوعية أنا بنت مش عاجبها حال البلد .... لا الحال الإقتصادي ولا الإجتماعي والأهم الحال السياسي  منيح ، كلو ماشي بالعكس :) ... ما شالله صرنا خبراء في كل شي في الكرة الأرضية إلا  وضعنا في  فلسطين .... يعني كل واحد فينا بنفع يشتغل محلل استراتيجي للولايات المتحدة وجنوب أفريقيا والصين والنرويج ، وكل واحد فينا كمان بنفع يكون خبير ومحلل اقتصادي فذّ وعبقري في ول ستريت ... بكل  اختصار احنا من يوم يومنا عباقرة يخزي العين ، ماشالله علينا ، وعلى قولة  سيتي الله يبعت لكل مشتهي زينا.... وبن ما بنروح بنعمر إلا في بلادنا بندمر....

وبعدين ... مش رح احكي عن الحواجز اللي صرنا نستغرب من الاسرائيلين لما يخلونا نمر من غير ما ياخدوا هوياتنا ... قبل اسبوعين الاسرائيلين خلونا نمر مرور الكرام عن حاجز الكونتينر " نواياهم دائما حسنة ومبادرين للخير والسلام ، بس إحنا اللي فاهمينهم صح" ... المهم وبعد ما عبرنا الحاجز وواد النار بسلام أمنين .... عند دوار العبيدية وإذ السلطة بتوقفنا وبتطلب هوياتنا " شكلو كان في تبادل أدوار في المسرحية ، وإحنا المشاهدين يا حسرتي علينا دايما فاهمين الكل صح " .... حدا عندو تفسير لمبدأ تبادل الأدوار اللي عم بيصير ولا شو الموضوع بالزبط يا جماعة ..... طيب خلص رح اسكت بلاش ازعل جماعة أوسلو " الله يحفظهم من العين شو أغبياء " ....

الأسبوع الماضي ، قررت لا أدرس ولا أغلب حالي ، رحت عملت عقد تفاهم مع التلفزيون وبلشت أتنقل بين المحطات وزي المواطن المحترم اللي بيقدر يروح على أي دولة من غير قصص وتعقيدات جواز السفر والفيزا  ... أكثر شيء حبيتو في رحلتي التلفزيونية هو حركة الاحتجاج الأمريكية " احتلوا ول ستريت " واللي امتدت عبر الولايات المتحدة الأمريكية ... ما رح أعلق كتير عالموضوع لأنو ماشاءالله المعلقين والخبراء العرب ما قصروا ... المهم وبلا طول سيرة هاي الحركة والمظاهرات ألهمتني بشيء جداً رائع ممكن يكسر جو الملل اللي احنا عايشنوا في فلسطين ....  وممكن يخلينا ننسى برد الشتا شوي  ....

فكرتي الجديدة اللي ما في حدا رح يرد عليها  واللي رح تقض مضاجع الإخوان في الاستخبارات الفلسطينية، أو يمكن لاء  اسمها " احتلوا رام الله وغزة " .... لحظة.... رام الله وغزة محتلين، كيف بدنا نحتلهم كمان مرة ؟ سؤال منطقي كيف بدنا نحتل مكان أصلاً محتل ؟ صعبة شوي ... بس بتصير، لأنو في فلسطين ما شالله علينا كل شي ممكن يصير، إذا بعنا فلسطين ، يعني صعبة نرجع نحتلها ، أكيد لاء :)

رام الله وغزة مساكين وضحايا‘ أحنا بنحملهم فوق طاقتهم يعني في كل مدينة ماشالله علينا عاملين  دولة ومؤسسات ومصدقين حالنا زي اللي عن جد..بنطبق علينا المثل اللي بيقول " بكذب الكذبة وبصدقها" شو ذنب رام الله وغزة يتحملوا كل هالعبء الإداري والسياسي مع إنهم مجرد مدنيتين عاديتين ومن حقهم يكونوا متل أي مدينة محتلة في الكرة الأرضية ...... لما حضراتنا نعلن كل وحدة عاصمة لدولة وهمية إحنا بندمرهم بزيادة وبنجبرهم ينسوا إنهم محاصرين من أربع جهات بمستوطنات وحواجز ومعابر عسكرية صهيونية... لذلك وجب علينا نحن المواطنين العاقلين واللي بنكره أوسلو وسنين أوسلو إنو نحتج ونعترض على كل الاتفاقيات اللي تم توقيعها والتي سوف يتم توقيعها مع ما يسمى اسرائيل ....ومن الواجب كمان نذكر الناس اللي في رام الله وغزة إنو في شعب عايش تحت احتلال وما في مسمى بينطبق علينا غير مسمى شعب تحت احتلال ...  كمان من الواجب نوقف ونصرخ ونقول بكفي تعاملونا كضحايا لأنو بهاي الطريقة بتسلوبنا جزء كبير من الطاقة اللي ممكن نستغلها في معالجة نقاط ضعفنا على سبيل المثال ... نحن لسنا بضحايا ، نحن لسنا بملائكة .. نحن شعب يحتاج لإعادة نفض ولخلق وعي جديد ولتغيير واقعه الداخلي قبل أن يطلب من العالم أن يدعمه لأخذ حقوقه ...احتلوا رام الله وغزة من أجل إصلاح أخطائنا ونتوقف عن الحديث بلهجة الضحايا ..نحن أصحاب حق ونستطيع الحديث بلهجة صاحب الحق القوي وليس بلهجة الضحية الضعيفة .... 

احتلوا رام الله وغزة من جديد أيها الفلسطينيون يرحمنا ويرحمكم الله ....