احتلوا رام الله وغزة من جديد أيها الفلسطينيون يرحمنا ويرحمكم الله

بكل صراحة وحيادية وموضوعية أنا بنت مش عاجبها حال البلد .... لا الحال الإقتصادي ولا الإجتماعي والأهم الحال السياسي  منيح ، كلو ماشي بالعكس :) ... ما شالله صرنا خبراء في كل شي في الكرة الأرضية إلا  وضعنا في  فلسطين .... يعني كل واحد فينا بنفع يشتغل محلل استراتيجي للولايات المتحدة وجنوب أفريقيا والصين والنرويج ، وكل واحد فينا كمان بنفع يكون خبير ومحلل اقتصادي فذّ وعبقري في ول ستريت ... بكل  اختصار احنا من يوم يومنا عباقرة يخزي العين ، ماشالله علينا ، وعلى قولة  سيتي الله يبعت لكل مشتهي زينا.... وبن ما بنروح بنعمر إلا في بلادنا بندمر....

وبعدين ... مش رح احكي عن الحواجز اللي صرنا نستغرب من الاسرائيلين لما يخلونا نمر من غير ما ياخدوا هوياتنا ... قبل اسبوعين الاسرائيلين خلونا نمر مرور الكرام عن حاجز الكونتينر " نواياهم دائما حسنة ومبادرين للخير والسلام ، بس إحنا اللي فاهمينهم صح" ... المهم وبعد ما عبرنا الحاجز وواد النار بسلام أمنين .... عند دوار العبيدية وإذ السلطة بتوقفنا وبتطلب هوياتنا " شكلو كان في تبادل أدوار في المسرحية ، وإحنا المشاهدين يا حسرتي علينا دايما فاهمين الكل صح " .... حدا عندو تفسير لمبدأ تبادل الأدوار اللي عم بيصير ولا شو الموضوع بالزبط يا جماعة ..... طيب خلص رح اسكت بلاش ازعل جماعة أوسلو " الله يحفظهم من العين شو أغبياء " ....

الأسبوع الماضي ، قررت لا أدرس ولا أغلب حالي ، رحت عملت عقد تفاهم مع التلفزيون وبلشت أتنقل بين المحطات وزي المواطن المحترم اللي بيقدر يروح على أي دولة من غير قصص وتعقيدات جواز السفر والفيزا  ... أكثر شيء حبيتو في رحلتي التلفزيونية هو حركة الاحتجاج الأمريكية " احتلوا ول ستريت " واللي امتدت عبر الولايات المتحدة الأمريكية ... ما رح أعلق كتير عالموضوع لأنو ماشاءالله المعلقين والخبراء العرب ما قصروا ... المهم وبلا طول سيرة هاي الحركة والمظاهرات ألهمتني بشيء جداً رائع ممكن يكسر جو الملل اللي احنا عايشنوا في فلسطين ....  وممكن يخلينا ننسى برد الشتا شوي  ....

فكرتي الجديدة اللي ما في حدا رح يرد عليها  واللي رح تقض مضاجع الإخوان في الاستخبارات الفلسطينية، أو يمكن لاء  اسمها " احتلوا رام الله وغزة " .... لحظة.... رام الله وغزة محتلين، كيف بدنا نحتلهم كمان مرة ؟ سؤال منطقي كيف بدنا نحتل مكان أصلاً محتل ؟ صعبة شوي ... بس بتصير، لأنو في فلسطين ما شالله علينا كل شي ممكن يصير، إذا بعنا فلسطين ، يعني صعبة نرجع نحتلها ، أكيد لاء :)

رام الله وغزة مساكين وضحايا‘ أحنا بنحملهم فوق طاقتهم يعني في كل مدينة ماشالله علينا عاملين  دولة ومؤسسات ومصدقين حالنا زي اللي عن جد..بنطبق علينا المثل اللي بيقول " بكذب الكذبة وبصدقها" شو ذنب رام الله وغزة يتحملوا كل هالعبء الإداري والسياسي مع إنهم مجرد مدنيتين عاديتين ومن حقهم يكونوا متل أي مدينة محتلة في الكرة الأرضية ...... لما حضراتنا نعلن كل وحدة عاصمة لدولة وهمية إحنا بندمرهم بزيادة وبنجبرهم ينسوا إنهم محاصرين من أربع جهات بمستوطنات وحواجز ومعابر عسكرية صهيونية... لذلك وجب علينا نحن المواطنين العاقلين واللي بنكره أوسلو وسنين أوسلو إنو نحتج ونعترض على كل الاتفاقيات اللي تم توقيعها والتي سوف يتم توقيعها مع ما يسمى اسرائيل ....ومن الواجب كمان نذكر الناس اللي في رام الله وغزة إنو في شعب عايش تحت احتلال وما في مسمى بينطبق علينا غير مسمى شعب تحت احتلال ...  كمان من الواجب نوقف ونصرخ ونقول بكفي تعاملونا كضحايا لأنو بهاي الطريقة بتسلوبنا جزء كبير من الطاقة اللي ممكن نستغلها في معالجة نقاط ضعفنا على سبيل المثال ... نحن لسنا بضحايا ، نحن لسنا بملائكة .. نحن شعب يحتاج لإعادة نفض ولخلق وعي جديد ولتغيير واقعه الداخلي قبل أن يطلب من العالم أن يدعمه لأخذ حقوقه ...احتلوا رام الله وغزة من أجل إصلاح أخطائنا ونتوقف عن الحديث بلهجة الضحايا ..نحن أصحاب حق ونستطيع الحديث بلهجة صاحب الحق القوي وليس بلهجة الضحية الضعيفة .... 

احتلوا رام الله وغزة من جديد أيها الفلسطينيون يرحمنا ويرحمكم الله ....