Tuesday, August 16, 2011

أيلول الحزين ...مسابقة اختيار اجمل اسم

 أسبوعين وبنودع شهر أب ..... أسبوعين وبنستقبل شهر أيلول ....أيلول شهر عجيب دائماً بحمل معو أشياء جديدة وبتكون بنكهة الموت معظم الأحيان ...انتفاضة ثانية في أيلول ...والتحرك ضد الفصائل الفلسطينية سنة 1970 في الأردن كان في أيلول ..... تفجيرات نيويورك كمان كانت في أيلول ... مسكين يا أيلول مش عارف شو لا شو بدك تتحمل .... 

 سنة 1970 كان اسمو أيلول الأسود والكل طبعاً عارف القصة من أولها لأخرها ... واللي ما بعرف القصة هي رابط هي مختصر مفيد وموجع للقصة الحزينة ... كلو ولا تزعلوا



 نرجع لصفات أيلول المرتبطة بالألوان .... يعني في 1970 أيلول أسود وشكلو في 2011  رح يصير اسمو أيلول البنفسجي

أنا بقترح نستغل الأسبوعين اللي باقيين من حياتنا ونعمل مسابقة لاختيار أجمل اسم لشهر أيلول 2011 يعني على غرار مسابقات ملكات الجمال والسوبر ستار .... حسب توقعاتي ....أبو مازن رح يفوز بجائزة أجمل اسم واللي رح تكون طبعا عبارة عن مجموعة إهانات واجتياحات واعتقالات من الجانب الإسرائيلي، بالإضافة لجائزة البرنامج الكبرى ألا وهي قطع جميع المساعدات وعوائد الضرائب لندخل فيما بعد بمتاهة نص الراتب وربع الراتب ..... 


خلينا في أيلول مش عارفة ليش أنا دائما بنط من قصة لقصة ..طيب كنا في أيلول وأجمل اسم ..شو خلانا نروح على قصة نص الراتب وربع الراتب ..... هلاء سلام فياض بزعل منا ...كلوا ولا يزعل سلام فياض منا " أبناء الشعب المخلصين  الشحاديين العايشيين على ربع راتب" ......
في أيلول وبكل فخر رح نصير الدولة الأوف لاين الوحيدة في العالم والأكثر تخلفاً، وانقساماً،وفقراً، وجوعاً، وجهلاً...رح ندخل موسوعة جينيس للأرقام القياسية بعدد الحمام الزاجل المستعمل في أيلول .... انبسطوا يا ناس وافرحوا ....

إن شالله وبقدرة قادر ربنا بهدي أبو مازن وبتراجع عن مشوار الأمم المتحدة اللي مش جايبة همها .....يعني عشان يرحمنا من فصل جديد في المسرحية الهزلية اللي مش كاينة تخلص ...يعني خلص عمرنا وإحنا بنفاوض إسرائيل " بنبيعهم الأرض" .... طيب يلا نجرب إشي تاني غير المفاوضات وقصة الأمم المتحدة " اللي أعطت اليهود الحق في دولة يهودية في فلسطين " يعني على مين إحنا بنضحك غير على حالنا .....

حضروا حالكو يا معشر الشباب للعيش بدون فيس بوك وبدون توتير وبدون مدونات وبدون جوال وبدون أي شي إله علاقة بإنك تكون أون لاين ...للمزيد عن تفاصيل الحياة أوف لاين ...اسألوا إخواننا في غزة عن تجربتهم في ظل الحياة الأوف لاين اللي عاشوها الأسبوع الماضي ... وعلى قولة المثل أسأل مجرب ولا تسأل حكيم ....  ودمتم سالمين يا معشر الأون لاين .....