الحياة مفاوضات من وجهة نظر مواطن فلسطيني

الواحد فينا والله ما بعرف من وين يبلش حكي ... كل عشر دقائق في مصيبة جديدة ... المصايب هاي المرة إنتاج فلسطيني بحت ، يعني اسرائيل تكتفي بالشماتة فينا هاي الأيام ... الواحد يا دوب عارف يمشي بالشارع في مدينة مزدحمة محاطة بالمستوطنات من جميع الجهات، ولو كان هناك جهة خامسة لوجدتها أيضاً مليئة بالمستوطنات .... باختصار شكراً أوسلو، شكراً أبو مازن ، شكراً فياض ، والأهم شكراً صائب عريقات " قصدي ساخم عريقات " ... قائمة الشكر طويلة ولن أوفيهم حقهم ... خدموا الوطن والمواطنين بما فيه الكفاية ... وسط هاي الفوضى والزحمة اللي بتجتاح حياتنا من عام 1917 طلع فجأة اشي يسلينا ويبعد عنا الملل شوي .. هادا الإشي بتقدروا تحكوا عنو محاولات شعرية فذة لا مثيل لها بالعالم ، لا بل بتاريخ البشرية ... من غير طول سيرة وحكي ع الفاضي ... 

مش عارفة مين اللي ضحك على صائب عريقات وحكالو انو بيعرف يكتب أو يفاوض ... صائب عريقات كذب الكذبة وصدقها ...  وصار في كتاب بالمكتبات اسمو " الحياة مفاوضات ل صائب عريقات "  أنا متأكدة 99.999999999 % إنو كان قصدو يسمي الكتاب " الحياة تنازلات ل صائب عريقات " بس بتعرفوا احنا بشر وكلنا خطائين يعني ... كل هادا الإشي لا يتعدى كونه خطأ مطبعي ... بسبب الخطأ المطبعي اللي صاير من قبل توقيع اوسلو صارت المستوطنات مترامية الأطراف ...والقدس في تهويد مستمر ...

 الحياة مفاوضات من وجهة نظر المواطن الفلسطيني : 

1-   إنك توقف على الحاجز على الأقل ثلاث ساعات بس بمجرد إنو أجا على بال الجندي يحجز هويتك ذات الغلاف الأخضر ...

2-   إنو الأب والأم ينتظروا 35 سنة حتى يشوفوا رفات جثة ابنهم الشهيد ...

3-  الحياة مفاوضات تعني إنو ثلاث أرباع الشعب يكون في السجون الإسرائيلية والقيادة الفلسطينية مقضيتها جولات سياحية من شرق الأرض لغربها

4-   الحياة مفاوضات يعني إنك برغم كل قنابل الغاز والرصاص لا يزال هناك شعب مصمم على البقاء في أرضه ...

5-   الحياة مفاوضات يعني إنك تضل تلف في دائرة مغلقة حول القدس لمدة ساعتين وأنت لا تستطيع دخولها ...

6-   الحياة مفاوضات يعني  كل يوم في  عشرين بيت على الأقل يتم بناءه في كل مستوطنة ....  مقابل تهجير 90 ألف بدوي فلسطيني

7-   الحياة مفاوضات تعني أنك  تقضي 8 ساعات على جسر اللنبي وفي مجندة لا تتعدى 18 عام بتصرخ فيك ...

8-   الحياة مفاوضات تعني إنك تنام وإنت مش متأكد إذا الشمس رح تشرق وإنت في وطنك أو لاء ....

9-   الحياة مفاوضات تعني وجود سبعة ملايين لاجىء فلسطيني حول العالم ما بدهم غيروا يرجعوا على بيوتهم ...

صائب عريقات  ارحمنا إنت وفريق مفاوضاتك ..إنتو ما بتفاوضوا ..إنتو عم بتقدموا تنازلات باسم الشعب اللي ما فوضكم تحكوا باسمو ....

ساخم عريقات احفظ ما تبقى من ماء وجهك واترك الخبز للخباز لو أكل نصفه ... " اعتقد أنك تنازلت أيضاً عما تبقى من ماء وجهك " ...

تنويه " كلمة مواطن فلسطيني " المقصود فيها أبناء الشعب وليس صائب عريقات "