Sunday, January 29, 2012

شوية كرامة

أعزائي المسافرين : أهلا بكم على الخطوط الجوية الفلسطينية، نتمنى لكم رحلة موفقة وسعيدة.
المسافرين الأعزاء : نأسف لقد نفذ رصيدنا من التصاريح الإسرائيلية، رجاءً كل واحد يرجع من محل ما أجا ..وشكراً. 

الكتابة عن رغد العيش في بلادي لاتحتاج لمقدمات أو تمهيدات. منذ سنين تعودنا أن نقول الأشياء على بساط أحمدي، لكن هذا البساط الأحمدي مسموح لناس وناس ، يعني كبار رجالات أوسلو بطلعلهم يحكوا شو ما بدهم، بينما نحن أبناء الشعب ما علينا سوى السمع والطاعة وما  نعارض ولا كلمة...هذا الخلل في توزيع البساط الأحمدي أدى إلى إنعدام ما يسمى " حركة المعارضة الفلسطينية" ..يعني بكل فخر واعتزاز إحنا الدولة الأولى في العالم اللي ما فيها حركة معارضة ... والدليل على هذا  الشيء أننا لا نتظاهر ولا نقرع الطناجر إلا عندما نشعر بالجوع .... 

سؤال ... ما الذي سوف يحصل لو قرعنا رؤوس رجالات أوسلو لاسترجاع شوية كرامة بدل ما نقرع الطناجر ؟؟؟ 

سؤال أخر : ما هو سر الجولات المكوكية الفتحاوية والحمساوية بين القاهرة وعمان في الآونة الأخيرة ؟؟ يعني لو كانت جولات مصالحة بين روسيا وأمريكا كان خلصت من زمان .... أنا بقترح إنو كل واحد يروح على بيتو أحسنلو وإحنا أبناء الشعب بنحل الموضوع بطريقتنا ... ما بدنا حلول على طريقة أوسلو ..شكراً 

سؤال ... أستاذ صائب عريقات مين حكالك تروح تفاوض باسمنا ؟ مين اللي فوضك ؟؟ طيب على الأقل اعملوا استفتاء وعبرونا شوي ولا رأينا لا بحل ولا بربط .. و لمعرفة أخر صرعات الموضة في فن المفاوضات لشتاء وربيع عام 2012 وما عليكم سوى متابعة نشرات الأخبار وخاصة " الجولات الإستكشافية". 


سؤال محير ... د. سلام فياض نحن بحاجة لمعرفة تفاصيل أكثر عن موضوع خطة التقشف وذلك من أجل أن نخفف سيل الشتائم التي تضر بشخصك الكريم وبمصلحة الدولة " ما تصدقوا كتير لسه ما صار في عنا دولة ". و أيضاً لماذا لا تقوم الحكومة بدفع المستحقات التي عليها للجامعات الفلسطينية ؟؟

سؤال مستفز ... المواطنين الأعزاء اللي مش لاقيين أكل ولا اشي يدفيهم في الشتا ..شو يعملوا بحياتهم ..يتظاهروا أمام المقاطعة ولا ينتحروا أحسن ؟؟ 

استفسار بسيط .. ليش على مدخل رام الله من جهة جبع .. ومدخل العيزرية بنقرأ لوحات مكتوب عليها " مناطق يهودا والسامرة " ؟؟ طيب وقعنا أوسلو وصار اسمنا " أراضي السلطة الفلسطينية " ليش قلة الإحترام هاي ؟؟ 

سؤال ع الطاير ... في أعلى بطاقة الهوية نجد الجملة التالية " السلطة الفلسطينية " ..لماذا مترجمة للعبري ؟؟؟ 


كمان سؤال ... كل الطرقات التي تربط مدن ما يسمى مدن " الضفة الغربية " هي طرقات رئيسية للمستوطنات ..ماذا لو تم إغلاق هذه الطرق ... كيف سنصل لجامعاتنا وبيوتنا ..هل من خطة حكومية لاعتماد الطيران كوسيلة نقل جديدة ؟؟

الحال في البلد لا يوصف بالكلمات ... ولا أدري ماذا أقول ... ربما هي كلمة واحدة تلخص حالنا ... " كرامة " ... خسرنا الوطن والأبناء وخسرنا كمان الكرامة ... والله مش ناقصنا غير شوية كرامة يا ولاد الحلال .... والله ما جاب أخرتنا إلا الحمامة إم غصن زيتون ..ارحموا الحمامة شوي واتركوها ترمي غصن الزيتون شوي ... وعلى قولة عبد الرحمن الأبنودي ...

ملعون أبوها الحمامة أم غصن زيتون
معمولة لاجل الضحايا يصدقوا الجلاد




No comments:

Post a Comment